闽南担家新妇

芒果小子潘径店

1
新妇：
母啊！婴仔乎你顾
我要出去吃普渡
会记共伊换尿布
牌仔无博袂耽误
闲闲抱伊去散步
带去公园学行路

担家：
无咧是你的奴才
逐项听你咧安排
恁翁若是做总裁
老岁煞着据你宰
看你彼个尖下颚
趁早去着趁早来

2
新妇：
阮翁若是有才调
嘛是你生的脚数
有倘好额尚好料
老岁毋倘嘴翘翘
等你袂走搁袂跳
嘛着靠阮咧关照

担家：
靠你这个好新妇
难怪阮是逐项有
厝里涂脚逐日撸
手皮磨破有血珠
田园着做几六区
未到五十腰龟龟



3
新妇：
老人若呣讲道理，
囝孙会去冤枉死，
你有拼扫擦桌椅，
我嘛三顿照直煮，
油盐酱醋鱼肉米，
全部是我咧排比。

担家：
你的功劳咔大天，
阮的辛苦全押边，
你敖你勥你后生，
当阮老岁老妖精，
看你彼个面青青，
苦阮呣去跌落坑。

4
新妇：
老岁你哪说这话？
声声句句咧相怪？
无人逼你去做活，
只是婴仔还搁细，
叫你看顾暂代替，
你哪闲话这呢多？

担家：
阮咧做活呣捌咳，
厝边头尾逐个知，
无代无志惦厝内，
淡薄闲话就不该？
悲哀悲哀真悲哀，
互你当作老痴呆。



5
新妇：
冤枉冤枉真冤枉，
说话较雄国民党，
大小全靠你拉拢，
莆你那咧莆老总，
就算心里有袂爽，
阮嘛毋敢黑白讲。

担家：
我吃凊糜软猴猴，
你吃大虾搁大鲍，
搁喊冤枉四界投？
做人新妇若是敖，
稍垮委屈吞落喉，
毋倘翁敖某翘头！



6
新妇：
毋爱甲你多超盘，
多盘多咧了嘴泉，
说啥自己野拖磨，
吃是袂饱困袂鼾，
我是听甲丢丢弹，
感冒烧热——畏寒！

担家：
说一句你印一句，
你这新妇歹对付，
翁都还搁未大富，
说话开始咧起雾，
等恁钱银赚规堵，
老岁煞着困祖厝？



7
新妇：
老岁说话毋套直，
儿女新妇歹过日，
恨我双脚袂生翅，
若无早就飞去晃，
恨我嘴唇无抹蜜，
互你看阮偌带疾。

担家：
哭苦一次搁一次，
厝里互你哭衰买，
毋是老岁袂理解，
是你少年性块歹，
苦劝你搁毋理睬，
早晚你会想跳海。

囝：
做翁做囝歹担当，
一面抹壁双面光。
想着阿母心就酸，
艰苦的路走外远，
养育之恩袂准断。
看着老某咧梳妆，
心情亲像苦瓜汤，
静静走去毋敢哼。
~~~~~~~~~~~~~~~~~~

pwj002

顶．支持，路过．．闪人．．．   

iwkqfnw

对不起，我走错地方了，呵呵